Istebeta y Blun, no guaire dublineses (2)

Blun, a cucha; Istebeta, a dreita. Personaches y nomes fitizios inspiraus en ista foto de niqmad



Istebeta: (Escandant els bersez mientres replega fuellas muertas ta adrezar d'agüerro la suya cambra.)
L'orache d'agüerro
é como un ziclón
destruye las fuellas,
las torna marrons.

Blun: (Sallint de dedaixo d'un buixo.)
Fa goyo sentir-te
de tan buena umor.

Istebeta:
Pos é un romazet
que he parodiau yo:
"Este Zapatero
es como un ciclón;
destruye familia,
nación y educación".
El zaguer berset,
que é llargo...

Blun: (Encarrañau.)
.................Copón!
No te'n burles gota,
que el ba dir Pastor!
Ana Pastor diz,
y talment Rajoy,
que la LOE enzeta
destruzions mayors.
Toz els catalans,
que son uns felons,
traman traidurías
ta...

Istebeta:
.....Qué bombolón!
Pos ñai més eslógans
que feban fortor.

Blun: (Més encarrañau.)
Si te'n fas la mofla
t'estripo el chipón.

Istebeta: (Escandant els bersez mientres fuye con la suya cullita de fuellas muertas.)
Jiménez Losantos
é como un ziclón:
Zyklon B que arrana
cualsiquier nazión.