Silba zaragozana y encarrañada

Zaragoza fa bellas añadas (u no, seguntes lo que se diz en ista silba)

Eba de l'año l'estazión florida,
florida no per flors,
antis per lo que flore con calors
a'ls que per caso fem bella sallida;
u siga, que eba agosto
-un mes que está pensau ta bel llangosto,
y no ta la Guineu-
cuan la Guineu, pansida,
ba ir enta Zaragoza;
y no perque querise bier la Seu
-l'esmo, si ñai retors, se me le boza-,
sino buscar llibrez en sobatida.
Le daba igual chicoz, grans u mediaus,
pero els queriba en llengua aragonesa
y, siñors,... la sorpresa!:
toz els puestos trancaus.
La Cálamo, l'Antígona y Central,
con güeito claus trancadas!;
y, súmmum de chanadas,
tamién la General!
Sí..., prou que ba trobar
ubierto el Corte Inglés
-"estante aragonés",
y bienga rechirar:
els Suenios y altros tres-.
Sí..., prou que ba trobar
ubierta la F(e)nac
-"estante de turismo", achoca y... crac!,
l'espalda t'has d'asclar
ta bier pe'l rinconet
solenco el Prenzipet-.
Y ban acabar duelos
ta Guineu cuan dixaba la zaguera,
que chusto a l'altra azera
ie benden carambelos.
Ba mercar un adoquín,
ba desfer l'embolico
y a'l papel del lamín
ba leyer, ba leyer... "Chufla, mañico"!
Y é ta yo disencusa no almitida
que "eba de l'año l'estazión florida".