Estigo como mai

Estigo como mai m'eba trobau,
tan ben que, entre barucas de bersez,
m'atribo a fer un soneto, sí, chiquez,
con música d'Ochoa aquí al costau:

"Els que guerra asobent m'han procurau
y ya me ban creyer feito trozez
con yo s'han trafucau, prou que el beyez;
estigo como mai, ixo ha pasau."

Ascuito ixas palabras y m'animo,
y pienso que, anque baigan criticant,
no el faigo pas tan mal cuan bersos rimo,

ben que l'aragonés ribagorzán
s'escapa contra més me ie aproximo.
Y prou, que iste soneto está acabant.

Estrambote:
Els cucos charrarán;
sí, Diago, no mos sallgas fuyidero,
que Elíades te'l diz ben esclatero.